Cofrestr Rhoddwyr Mêr Esgyrn Cymru yn ymuno â Fforwm Hil Cymru i gael amrywiaeth o bobl ar y panel rhoddwyr bôn-gelloedd

Mae Cofrestr Rhoddwyr Mêr Esgyrn Cymru yn gweithio gyda Fforwm Hil Cymru i annog rhoddwyr bôn-gelloedd gwirfoddol o gymunedau Du, Asiaidd, Ethnigrwydd Cymysg/Lluosog a Lleiafrifoedd Ethnig i ymuno â'n brwydr yn erbyn canser y gwaed, a rhoi ail gyfle ar fywyd i gleifion ar draws y byd.

Mae gan Gofrestr Rhoddwyr Mêr Esgyrn Cymru banel o roddwyr gwirfoddol sydd wedi cytuno i roi eu bôn-gelloedd i gleifion sydd angen trawsblaniad bôn-gelloedd.

Mae trawsblaniadau bôn-gelloedd yn cael eu defnyddio i drin canserau'r gwaed fel lewcemia, lymffoma, myeloma ac anemia aplastig difrifol, ac i ddarparu opsiwn triniaeth ar gyfer rhai anhwylderau gyda’r system imiwnedd ac anhwylderau metabolig. Gall trawsblaniad bôn-gelloedd fod yn ddewis olaf claf i geisio gwella o’u salwch.

Yn y Deyrnas Unedig, mae tua 2,000 o drawsblaniadau bôn-gelloedd yn digwydd bob blwyddyn, ac mae'r ffigwr hwn dros 50,000 ar draws y byd. Dim ond 25% o gleifion sydd angen trawsblaniad fydd yn dod o hyd i roddwr addas sydd yn cydweddu â nhw o fewn eu teulu eu hunain. Pan nad yw claf yn gallu dod o hyd i roddwr sy’n cydweddu â nhw o fewn eu teulu, gellir chwilio drwy gofrestri ar draws y byd am roddwr sydd ddim yn perthyn.

Fodd bynnag, nid yw tri o bob deg claf yn dod o hyd i roddwr sy’n cydweddu ar baneli rhoddwyr byd-eang sydd ddim yn perthyn, ac mae'r risg o beidio â dod o hyd i roddwr yn cynyddu i gleifion ethnigrwydd ethnig, oherwydd y cynnydd mewn amrywiaeth genetig a'r diffyg cynrychiolaeth ar gofrestri rhoddwyr byd-eang. Yn anffodus, mae hyn yn tynnu sylw at y ffaith bod angen cleifion Du, Asiaidd, Ethnigrwydd Cymysg/Lluosog a Lleiafrifoedd Ethnig ar draws Cymru, y DU ac yn fyd-eang.

Mae Cofrestr Rhoddwyr Mêr Esgyrn Cymru yn awyddus i fynd i'r afael â'r angen hwn, drwy ffurfio perthnasoedd cryf â chymunedau Du, Asiaidd, Ethnigrwydd Cymysg/Lluosog a Lleiafrifoedd Ethnig yng Nghymru. Rydym wedi ymrwymo i ddatblygu panel o roddwyr bôn-gelloedd mwy amrywiol, sy’n ateb anghenion a gofynion cleifion o bob cefndir ethnig, a darparu mynediad cyfartal at opsiynau triniaeth i bawb sydd angen trawsblaniad bôn-gelloedd.

Mae'r goroeswr canser gwaed Simona Dubas yn esbonio pa mor ddiolchgar oedd hi ei bod hi'n gallu dod o hyd i roddwr a achubodd ei bywyd.

"Pan wnes i ddarganfod bod rhoddwr yn cydweddu â fi, roeddwn i mor ofnadwy o ddiolchgar, a dwi'n meddwl wedi fy llethu, gan y person anhunanol hwn. Mae hyn yn rhywbeth na allwch ei ddisgrifio mewn geiriau. Buaswn i'n dweud wrth unrhyw un sydd â diddordeb mewn dod yn rhoddwr mêr esgyrn, bod hyn yn beth nobl dros ben i'w wneud. I lawer o bobl sydd â chanser y gwaed ac anhwylderau gwaed eraill, trawsblaniad yw eu hunig gyfle i wella o'u salwch, eu dewis olaf. Meddyliwch pa mor falch fyddech chi pe byddech chi'n achub bywyd rhywun".

Os oes gennych chi ddiddordeb mewn ymuno â phanel rhoddwyr bôn-gelloedd Cymru, gallwch gofrestru ar-lein, gan ddefnyddio'r ddolen isod, i naill ai fynychu sesiwn rhoi gwaed neu i ofyn am becyn swab 'boch' a fydd yn cael ei anfon yn y post.

Ymunwch â Chofrestr Rhoddwyr Mêr Esgyrn Cymru heddiw. Gallech fod yn ddieithryn perffaith i glaf sydd angen trawsblaniad, a rhoi ail gyfle ar fywyd iddyn nhw.

Os oes gennych chi unrhyw gwestiynau neu os hoffech ragor o wybodaeth am ymuno â'r panel neu am y gwaith rydym yn ei wneud yn y gofrestr, cysylltwch â ni yng Nghofrestr Rhoddwyr Mêr Esgyrn Cymru, a buaswn yn fwy na hapus i helpu (e-bost: wbmdr@wales.nhs.uk ffôn: 01443 622177 oriau swyddfa 9am -5pm).